Доктор, профессор Г.Билгүүдэйн “Монголчуудын аман уламжлал ба “Монголын Нууц Товчоо” ном нь Монголчуудын аман уламжлалыг домог үлгэр, баатарлаг тууль, аман түүх гэсэн хэлбэрээр уламжлан өвлүүлдэг нүүдэлчдийн эртний соёлтой холбон тайлбарласан эрдэм шинжилгээний ганц сэдэвт нэмэн засварласан бүтээл болно.
Энэхүү аман уламжлалын тогтолцоо гэдэгт доктор, профессор Г.Билгүүдэйн нүүдэлчин түмний дунд ихэд дэлгэрсэн өвөг дээдсийнхээ гарал угсааг хойч үедээ амаар ярьж өвлүүлдэг эртний соёл, хүрээлэн байгаа байгаль дэлхий, орчлон ертөнцийг үзэх үзлийн илрэл болдог домог, домог-үлгэр, эрт үеийн өвөг дээдсийн гавьяат үйлсийг магтан дуулсан “түүхэн дуртгал” гэж хэлж болох баатарлагийн туульс, хууч яриа, аман түүх, ардын дундаас төрөн гардаг цэцэн цэлмэг хүмүүсийн хэлсэн билиг сургаал, зүйр цэцэн үг, өвөг дээдсийн нүүдэлчин ахуйн асар их туршлагын хуримтлал болсон өтгөсийн үг, эртний нүүдэлчин түмний нийгмийн харилцааны илрэл гэж болох магтаал ерөөлийн үгс, тал нутгийн язгууртны олон талт харилцааны тусгал болсон андалдах тангаргийн үг, тэр цагийн эрхтэн дархтны хооронд тогтсон “дипломат” харилцааны соёлын ололт “дуу бариулах ёс” гэх мэт аман зохиолын бараг бүх төрөл зүйлийг хамарсан өргөн хүрээтэй асуудлуудыг судалжээ.
