Монгол Улсын Төрийн шагналт, Хэл бичгийн шинжлэх ухааны доктор (Sc.D), профессор, Эрдэмтэн-зохиолч, Утга зохиолын онолч, шүүмжлэгч, сурган хүмүүжүүлэгч Ш.Гаадамбын мэндэлсний 100 жилийн ойд зориулсан “ХХ ЗУУНЫ МОНГОЛ ХЭЛ БИЧГИЙН УХААНЫ ХӨГЖИЛ ТӨЛӨВШИЛ: ШАНЖМЯТАВЫН ГААДАМБА-100” эрдэм шинжилгээний хурал Чингис хаан үндэсний музейн хурлын танхимд 2024 оны есдүгээр сарын 27-нд боллоо. Хурлын ерөнхий зохион байгуулагчаар Шинжлэх ухааны академи, ШУА-ийн Хэл зохиолын хүрээлэн, Боловсролын яам, Эдийн засаг хөгжлийн яам, дэмжигч байгууллагаар Чингис хаан үндэсний музей, ШУА-ийн Түүх угсаатны зүйн хүрээлэн, Боловсролын судалгааны үндэсний хүрээлэн, Монгол улсыг их сургууль, Монголын үндэсний номын сан, Монголын зохиолчдын эвлэл, Булган аймгийн Засаг даргын тамгийн газар, Булган аймгийн Хишиг-Өндөр сумын ерөнхий боловсролын сургууль, “Улирал ба зохиолч” сэтгүүл зэрэг байгууллага хамтран зохион байгуулагчаар ажиллав.
Хуралд монгол судлал, монгол хэл бичгийн ухааны манлай эрдэмтэд оролцож Ш.Гаадамбын амьдрал, уран бүтээлд холбогдох олон сонирхолтой илтгэлийг хэлэлцүүлж, түүний монгол хэл, утга соёл, сурган хүмүүжүүлэх ухаанд оруулсан хувь нэмрийг тодруулж хойч үедээ сурталчлан таниулсан юм. Тухайлбал, хурлын үндсэн илтгэлийг МУ-ын Шинжлэх ухааны гавьяат зүтгэлтэн, доктор (Sc.D) профессор С.Байгалсайхан “Ш.Гаадамбын хэл, утга соёлын ертөнц ба ХХ зууны монгол утга зохиол” сэдвээр хэлэлцүүлэв. Мөн МУ-ын Төрийн шагналт, Шинжлэх ухааны гавьяат зүтгэлтэн, академич Д.Цэрэнсодном “Ш.Гаадамба бол шинжлэх ухаанд дээлтэй төрсөн хүн”, МУ-ын Шинжлэх ухааны гавьяат зүтгэлтэн, академич Л.Болд “Ш.Гаадамба бол “Монголын нууц товчоо” судлалын гарамгай эрдэмтэн мөн”, МУ-ын Соёлын гавьяат зүтгэлтэн, доктор, профессор Ч.Дагвадорж “Эрдэмтэн багшийн нөмөр нөөлөг”, МУ-ын Гавьяат багш, доктор, профессор Ч.Жачин “Эх хэлний боловсрол, сургалтын талаарх Га багшийн үзэл”, доктор, профессор Г.Билгүүдэй “Нийгмийн сэтгэлгээг шинэчлэх хүслэнд хөтлөгдсөн он жилүүд”, МУБИС-ийн багш, доктор, профессор С.Энхбаяр “Монгол Улсын Төрийн шагналт, эрдэмтэн зохиолч, нэрт онолч Ш.Гаадамба агсны Монгол утга зохиолын онолын сэтгэлгээнд эзлэх байр суурь”, доктор Т.Баясгалан “Ш.Гаадамбын монгол аман зохиол судлалд оруулсан хувь нэмэр”, доктор, профессор Г.Галбаяр “Монгол шүлгийн судлалд эрдэмтэн Ш.Гаадамбын оруулсан хувь нэмэр”, доктор, профессор Р.Чүлтэмсүрэн “Ш.Гаадамбын “Чөдөр өвс” өгүүллэгийн эх дүр, үзэл санаа, үнэлэмж”, доктор, профессор Ц.Магсар “Ш.Гаадамбын орчуулгын зохиол”, МУ-ын Соёлын гавьяат зүтгэлтэн, доктор, профессор Д.Цэнджав “Эрдэмтэн Ш.Гаадамба-Оюун санааны эрх чөлөөг манлайлагч мөн”, МУИС-ийн Утга зохиол, урлаг судлалын тэнхэмийн эрхлэгч, доктор, профессор Б.Хишигсүх “Ш.Гаадамбын “Элбэг дээл” уран сайхны кино”, доктор (Sc.D), профессор С.Хөвсгөл, доктор П.Яньдий нар “Ш.Гаадамбын “Багын явдал” туужийн хүүгийн дүрийн харьцуулалт”, доктор, дэд профессор А.Мөнх-Оргил “Уран зохиолын арга өргөн хэлэлцүүлгийн сэдэв болсон хийгээд түүнд холбогдох Ш.Гаадамбын байр суурь”, доктор, дэд профессор Ө.Саранцэцэг, докторант Ли Ли нар “Эрдэмтэн зохиолч Ш.Гаадамбын утга зохиолын үзэл баримтлал ӨМӨЗО-д нөлөөлсөн байдал”, доктор, дэд профессор Д.Болормаа, доктор З.Пүрэвсүрэн нар “Ш.Гаадамба “Монгол сурвалж дахь түүхэн домог”-ийг судалсан нь”, доктор, дэд профессор Б.Энхээ “Эрдэмтэн зохиолч Ш.Гаадамбын “Сургах цээж бичгийн эх” номын өнөө цагийн ач холбогдол” сэдэвт илтгэлийг хэлэлцүүлж “Ш.Гаадамба судлал”-ыг баяжуулж, шинэ соргог мэдээ мэдээлэл, намтарт холбогдох баримтыг солилцсон амжилттай хурал болж өндөрлөлөө.
Хурлын үргэлжлэл 2024 оны есдүгээр сарын 28-нд Булган аймгийн Хишиг-Өндөр суманд Монгол Улсын Төрийн шагналт, Хэл бичгийн шинжлэх ухааны доктор (Sc.D), профессор, Эрдэмтэн-зохиолч, Утга зохиолын онолч, шүүмжлэгч, сурган хүмүүжүүлэгч Шанжмятавын Гаадамбын хөшөөний нээлт боллоо. Энэ үеэр ШУА-ийн Хэл зохиолын хүрээлэнгийн эрдэмтэд эрдэм дэлгэрүүлэх, сурталчлах зорилгын хүрээнд академич Л.Болд “Эрдэмтэн, зохиолч Ш.Гаадамбын намтарт холбогдох зарим баримтыг тодруулах нь”, доктор, профессор Г.Билгүүдэй “Эрдэмтэн-зохиолч, утга зохиолын онолч, шүүмжлэгч, сурган хүмүүжүүлэгч Шанжмятавын Гаадамбын туурвисан утга зохиолын онол, түүх, монгол судлалын эрдэм шинжилгээний бүтээлүүд, уран зохиолын туурвилын тухай”, доктор Т.Баясгалан “Ш.Гаадамбын монгол аман зохиол судлалд оруулсан хувь нэмэр”-ийг тодруулж, лекц уншиж сонсголоо.
