ЭРДЭМТЭН Л.БАЛДАНЫ “ЭРДМИЙН БҮТЭЭЛИЙН ӨВ” ЭРДЭМ ШИНЖИЛГЭЭНИЙ ХУРАЛ, НОМЫН НЭЭЛТ БОЛНО
ШУА-ийн Хэл зохиолын хүрээлэнгийн ахмад ажилтан, Монгол улсын шинжлэх ухааны гавьяат зүтгэлтэн, шинжлэх ухааны доктор (Sc.D), профессор Л.Балданы “Эрдмийн бүтээлийн өв” эрдэм шинжилгээний хурал, “Эрдмийн бүтээл” V боть номын нээлт 2021 оны 11 сарын 8-ны 13.00 цагт ШУА-ийн Тэргүүлэгчдийн байрны хурлын танхимд болно.
Эрдэм шинжилгээний хурлыг Хэл зохиолын хүрээлэнгийн Утга зохиол судлалын салбарын эрдэм шинжилгээний ажилтан Ж.Ууганбаатар хөтлөх бол хурлыг нээж ШУА-ийн Хэл зохиолын хүрээлэнгийн захирал доктор (Sc.D), профессор Ж.Бат-Ирээдүй, Монгол улсын шинжлэх ухааны гавьяат зүтгэлтэн, академич Л.Болд нар үг хэлнэ. Эрдэм шинжилгээний хуралд Монгол улсын шинжлэх ухааны гавьяат зүтгэлтэн, доктор, дэд профессор Э.Пүрэвжав “Л.Балданы хэл шинжлэлийн бүтээлүүд”, Монгол улсын гавьяат багш, доктор, профессор Ч.Жачин “Д.Нацагдорж судлал ба Л.Балдан”, доктор, дэд профессор Г.Гэрэлмаа “Нэр томьёо, тайлбар толь судлал ба Л.Балдан”, доктор Б.Мөнхбаяр “Утга зохиол судлал ба Л.Балдан”, ЭША Ж.Ууганбаатар “Эрдэмтэн Л.Балданы “Эрдмийн бүтээл” 5 боть номын тухай” зэрэг илтгэлийг хэлэлцүүлэх юм байна.
Хурлын 2-р хэсэгт Монгол улсын Шинжлэх ухааны гавьяат зүтгэлтэн, шинжлэх ухааны доктор (Sc.D), профессор Л.Балданы “Эрдмийн бүтээл” V ботийн нээлт болно. ШУА-ийн Хэл зохиолын хүрээлэнгийн Утга зохиол судлалын салбарын эрдэм шинжилгээний ажилтан Ж.Ууганбаатар “Эрдмийн бүтээл” V боть номын тухай танилцуулна. Мөн Л.Балданы гэргий Монгол улсын Ардын эмч, Анагаахын шинжлэх ухааны доктор (Sc.D), профессор Д.Сэржээ, Л.Балданы хүү Онц бөгөөд Бүрэн эрхт Элчин, доктор Б.Энхмандах нар үг хэлнэ.
Л.Балдан нь “Д.Нацагдорж судлал”, монгол хэл шинжлэл, нэр томьёо, тайлбар толь судлал, утга зохиол судлалаар судалгаа хийж, монголын шинжлэх ухаанд өөрийн гэсэн тод мөрөө үлдээсэн манай ахмад эрдэмтний нэг билээ.
Бусад мэдээлэл
