Монгол Улсын Ёс зүйн хороо “Төрийн албан хаагчийн ёс зүйн тухай хууль”-ийн хэрэгжилтийг хангах үүднээс Канад-Монголын Мерит төслийн дэмжлэгээр “Төрийн албан хаагчийн ёс зүйн нэр томьёоны тайлбар толь”-ийг хэвлүүллээ. Энэхүү толь бичгийг философи, шашин судлал, сэтгэл зүй, хэл шинжлэл, төрийн удирдлага, эрх зүй, социологи зэрэг салбарын эрдэмтэн судлаачид хамтран боловсруулсан юм.
ШУА-ийн Хэл зохиолын хүрээлэнгээс захирал, доктор (Ph.D), дэд профессор О.Шинэбаяр ерөнхий редактораар, Хэрэглээний хэл шинжлэлийн салбарын эрхлэгч, доктор (Ph.D), ЭШТА Н.Мөнхцэцэг толь бичгийн арга зүйг боловсруулахад зөвлөн тусалж, зохиогчоор тус тус оролцсон байна.
Тус толь бичигт олон улсын болон үндэсний хэмжээнд мөрддөг хууль тогтоомжид түгээмэл хэрэглэдэг, ёс суртахууны философи, төрийн албаны болон байгууллагын ёс зүй, мэргэжлийн ёс зүй, бизнесийн ёс зүй, шинжлэх ухааны ёс зүй, хиймэл оюун, мэдээлэл харилцааны ёс зүйн нэр томьёог англи дүйцэл, тодорхойлолт, тайлбар, жишээгээр баяжуулан боловсруулжээ. “Төрийн албан хаагчийн ёс зүйн нэр томьёоны тайлбар толь” нь төрийн албан хаагч, байгууллагуудын Ёс зүйн дэд хороо, эрдэмтэн судлаач, оюутан залуус болон ёс зүйн ухааныг сонирхон судлагч хүн бүхэнд гарын авлага болж, ёс зүйн мэдлэгийг нэмэгдүүлэхэд бодит хувь нэмэр оруулна гэдэгт итгэж байна. Энэхүү толь бичгийг эрхэлсэн Монгол Улсын Ёс зүйн хороо, санхүүжүүлсэн Канад-Монголын Мерит төслийн баг, зохион байгуулалтын баг, редакцын зөвлөл, хамтран зохиогчдодоо талархал илэрхийлье.