2022 оны 10 сарын 21-нд ШУА-ийн Хэл зохиолын хүрээлэн, Дорнод аймгийн Засаг даргын хэрэгжүүлэгч агентлаг Соёл, урлагийн газар хамтран хамтын ажиллагааны санамж бичгийг байгуулсан бөгөөд хамтран хэрэгжүүлэх олон талт үйл ажиллагааг тусгаж эхнээс нь бодит биелэлээ олж байна.  

ШУА болон орон нутагтай хамтран ажиллах бодлогын хэрэгжилтийг хангах, ШУА-ийн Хэл зохиолын хүрээлэн, Дорнод аймгийн СУГ-тай байгуулсан санамж бичгийн хүрээнд Хэл зохиолын хүрээлэнгийн Аман зохиол судлах салбар дараах ажлуудыг хийхээр төлөвлөн ажиллаж байгаа юм. Тухайлбал, тус хүрээлгийн хөмрөгт хадгалагдаж байгаа Дорнод аймгийн аман зохиолын зүйлсийг эргэлтэд оруулж “Монгол аман билиг: Дорнод аймаг” номыг хамтран хэвлүүлэх, соёлын биет бус өв (СББӨ)-ийг сурвалжлан тодруулах, уламжлуулах, мартагдсан өвийг сэргээх, хамтарсан шинжилгээний анги ажиллуулах, аргазүйн туслалцаа үзүүлэх, хэл аялгуу, угсаатны зан зан заншлын зарим судалгаа хийх, Академич Ц.Дамдинсүрэнгийн намтар, бүтээлийг хамтарч сурталчлах зэрэг олон чиглэл тусгагдсан билээ. 

Хоёр байгууллагын санамж бичгийн 2.1 –ий заалтын дагуу тус хүрээлэнгийн Аман зохиол судлах салбар 2023 оны 04 дүгээр сарын 5-7-ны өдөр Дорнод аймгийн Чойбалсан хотод болсон аймгийн Соёл, урлагийн салбарын хөгжлийг дэмжих арга хэмжээний хүрээнд хэрэгжиж буй “ҮЛ БҮДГЭРЭХ ИХ ӨВ-2023” СББӨ-ийн сургалт, эрдэм шинжилгээний хурал, бусад арга хэмжээнд амжилттай оролцоод ирлээ.  

 Дорнодын соёл, урлаг судлалын эрдэм шинжилгээний хурал, илтгэлийн уралдаан, Ерөөл, магтаал, морь бөх цоллогч, уртын дууны уралдааныг Хэл зохиолын хүрээлэнгийн Аман зохиол судлалын салбар дэмжиж хамтран зохион байгуулагчаар  оролцов.