Монголын орчин үеийн утга зохиолыг үндэслэгч, их зохиолч Дашдоржийн Нацагдоржийн мэндэлсний 120 жилийн ой 2026 онд тохиож байна.

Их зохиолчийн Монголын соёл, утга зохиолын хөгжлийн түүхэнд гүйцэтгэсэн үүрэг, оруулсан хувь нэмрийг олон нийтэд сурталчлан таниулах зорилгоор “Ой тэмдэглэх тухай” Засгийн газрын тогтоолын төслийг боловсруулж, 2026 оны 1 дүгээр сарын 21-ний өдрийн Засгийн газрын хуралдаанаар хэлэлцүүлэн баталлаа.

Их зохиолч Д.Нацагдоржийн мэндэлсний 120 жилийн ойг тэмдэглэх хүрээнд түүний уран бүтээл, үзэл санаа, соёлын өвийг түгээн дэлгэрүүлэх олон талт арга хэмжээг улс орон даяар зохион байгуулахаар Соёл, Спорт, Аялал Жуулчлалын Яамнаас төлөвлөж байна. Дэлгэрэнгүй мэдээллийг: https://mocsty.gov.mn/news/013002

Их зохиолч Д.Нацагдорж 1921 оноос Цэргийн яаманд бичээч, их жанжин Д.Сүхбаатарын гарын туслах түшмэл, Цэргийн зөвлөлийн нарийн бичгийн даргын алба хашиж, хэвлэл, шинжлэх ухаан, соёлын байгууллагад ажиллаж, 1931 оноос Шинжлэх ухааны хүрээлэнд эрдэм шинжилгээний ажилтан, 1934 онд мөн хүрээлэнд Түүхийн ба Дуун ухааны тасгийн эрхлэгч, 1937 онд Төв театрт мэргэжлийн зохиолчоор ажиллаж байсан байлаа. Нэгэн түүх сөхвөөс: Судар бичгийн хүрээлэнгээс Д.Нацагдоржийг “Үгээгүй айлын хөвгүүн”, “Чингис хааны амьдралаас” жүжгийн зохиол бичсэний тул 30 лан мөнгөөр шагнаж байжээ.